Chisteria Colectiva é unha homenaxe á xoia da coroa do humor: o chiste. Ese relato brevísimo que sobrevive durante décadas, e mesmo séculos, cruzando tabernas e sobremesas, perfeccionándose, limándose e sintetizándose ata chegar a nós convertido nun diamante polido. Durante ese camiño, moitas veces o chiste extravía a súa autoría e pasa a converterse en patrimonio de quen o conta.

En Chisteria Colectiva reuniranse os grandes ourives do chiste en España: Miguel Miguel, JJ Vaquero, Álex Clavero, Jazmín Abuín, Arantxa Treus, Xosé A. Touriñán, Luis Piedrahita e moitos máis. Todos eles, contrabandistas do tesouro máis valioso da comedia, soben ao escenario do Teatro Colón para baleirarse os petos e contarnos os seus mellores chistes.

En Chisteria Colectiva contaranse chistes, analizaranse chistes, retorceranse chistes, convidarase o público a compartir os seus favoritos, xulgaranse con rigoroso surrealismo… e ata se premiarán as mellores ocorrencias da noite.

Chisteria Colectiva estrearase no Teatro Colón da Coruña coa intención de render homenaxe ao tesouro máis valioso da comedia.